பருப்பும் நெய்யும் சேர்த்து குழந்தைகளுக்கு சோறூட்டிய அம்மாக்கள், இன்று பீட்சாவுக்கும் பர்கருக்கும் மாறிக் கொண்டிருக்கிறார்கள். பள்ளி முடித்து, வீடு திரும்பும் குழந்தைகளுக்கு சுண்டலோ, சாலட்டோ கொடுத்து திருப்திப்படுத்த முடிவதில்லை இன்றைய அம்மாக்களால். அடம் பிடிக்கிற பிள்ளைகளை சமாதானப்படுத்தவும், சாப்பிட வைக்கவும் பீட்சா, பர்கர், சாண்ட்விச், ஃப்ரென்ச் ஃப்ரைஸ், நக்கெட்ஸ், ஹாட் டாக் என நவீன உணவுகளை வாங்கிக் கொடுக்க வேண்டிய கட்டாயம் பலருக்கும். கடைகளில் வாங்கும் உணவுகளில் ஆரோக்கியத்துக்கு உத்தரவாதமில்லை எனத் தெரிந்தாலும், வேறு வழியில்லையே... ‘இதையெல்லாம் வீட்லயா செய்து தர முடியும்?’ எனக் கேட்கும் அம்மாக்களுக்கு, முடியும் என்கிற நம்பிக்கையைத் தருகிறார் சென்னை, வடபழனியைச் சேர்ந்த செல்வமணி.
